قبل ماتنزلي تشتري الاجهزه
لازم لازم تسألي كل اللي حواليكي ..اللي انا خترته دا حلو ؟ يعني اللي جربو الحاجه هيقدرو يفيدوكم اذا كانت وحشه ولا لا
ودي اكتر حاجه انا استفدتها اني سألت وشوفت رأيهم وكلامهم عن اللي انا اخترته
والحمد لله جبت احسن المركات
..
وبعد ماتختاري وترسي عل اللي انتي عايزاه
وتعملي اهم حاجه استخاره والله بتفرق اوي وربنا بيقف معاكي وانتي بتشتري وانتي بتختاري وبيوفقك للصح
..
خلاص اخترتي ورسيتي علي المركات؟
وتنزلي تلفي علي محلات الاجهزه الكهربائيه متكسليش
وتاخدي معاكي كراسه او ورقه وتكتبي المحل الفلاني
التلاجه الفلانيه سعر كذا
البتوجاز الفلاني سعره
وهكذا...
وتكتبي اسعار كل الحاجات اللي انتي اخترتيها وتشوفي في كل المحلات مين الارخص
..
وفي حاجه كمان يابنات لو احترتي ومش عارفه تختاري ماركه معينه .. يعني مثلا مثلا مثلا اخترتي التلاجه ال جي وجيتي تسالي البنات وفي ناس شكرت فيها وناس قالت وحشه .. شوفي اسألي اي واحد بتاع صيانه قوليله اي اكتر ماركه بتصلحها والناس بتشتكي منها وبتقول وحشه .. وبجد هتاخدي منه الخبره لانه اكتر واحد يعرف اي اللي كويس واي الوحش
..
نزلتي المحلات وسألتي علي الاسعار وكله تمام ورسيتي علي محل معين لان اسعاره كويسه واخترتي خلاص الحاجات اللي هتجيبها؟
تعملي صلاه استخاره وتتوكلي علي الله وتشتريها
..
وقبل كل حاجه لااااااازم تاخدي بالك وتعملي حسابك علي نقطه مهمه جدا
ميبقاش مطبخك صغير وتروحي تجيبي تلاجه زي بتاعه الجزارين الكبيره اوي دي ام 4 ابواب باضحك
المقصود انك تشوفي المقاسات بالظبط وتجيبي اللي يناسب مطبخك عشان متزنقيش نفسك
وبرضو خدي بالك من البتوجاز
(ونصيحه ابوس ايدك بلاش يونيفرسال انا بكره الماركه دي اووووي والكل بيقول وحشه وعندي هنا في بيتنا بجد حاجه تقرف تقرف تقرف )
..
خدنا المقاسات وكله تمام واتوكلنا علي الله ونازلين نشتري الاجهزه
..
تاخدي مين؟ مين ؟ مين؟
بصي بلاش ناس كتير هيلبخوكي بجد وممكن تنسي حاجات وحاجات تتوه وتضيع منك
..
هتاخدي بابا وماما واخوكي ولو ينفع خطيبك يبقي تمام
..
تفتحي كل حاجه من كرتونتها وتفرزيها حته حته مهمه جدا النقطه دي يابنات انا معملتش كدا في الغساله والتلاجه عشان قولنا هتقرفنا ومش مهم
وجيت البيت الحمد لله التلاجه تمام لكن الغساله فيها غلطه من ورا
..
يبقي تمام شوفتي كل حاجه وشيكتي عليهم وكله اشطهابتسامة
..
اوعي تنسي شهادات الضمان اووووعي (انا نسيتهم ورجعت خدتهم بعد يومين لما فتحنا التلاجه والغساله .. ليه بقي ؟؟ لان في حاجات انا جبتها صناعه مش مصري عشان كدا مش معاهم الضمان والضمان بناخده من الراجل نفسه .. وطبعا وسط اللبخه وشيل وحط وشيك وطبعا كنت انا وخطيبي وامي وبس .. وامي كل شويه تسيبنا ومعرفش تختفي فين وتروح تشتري حاجات عجيبهباضحكواحنا لايصين انا قاعده جمب الحاجه علبان العربيه ماتيجي وخطيبي راح يجرب المكنسه والشاشه يعني لبخه سودا )
فا انتي تاخدي بالك يبقي في حد واقف جمب الحاجه مخصوص والعربيه تكون جاهزه ومعاكو من الاول لان دي كانت غلطتي احنا سبقنا وخلينا العربيه تيجي بعدنا ..
..
هتاخدي طبعا فاتوره بالحاجات اللي اشتريتيها
هتقفي علي العربيه وتعدي الحاجات اللي طلعت العربيه وتعلمي عليها علامه صح يعني طلعت خلاص
..
وخطيبك طبعا يقف معاكي او اخوكي
تمام لحد كدا
..
توصل الاجهزه بالسلامه البيت ( لو عرفتي تفكيها تاني وتطلعي شهادات الضمان والكتالوجات من كل الاجهزه يبقي تمام .. لو معرفتيش يبقي وانتي بتشتري من هناك وبتفكري عشان تشوفي الحاجه ابقي طلعيهم وحطيهم في دوسيه مع بعض وهقولك ليه)
عشان تقريهم كويس وتفهمي للاجهزه قبل الفرح عشان لما تتجوزي مش تحتاسي بقي وتقضيها قرايه كل ماتيجي تعملي حاجه .. ودا بالنسبالي احسن انا عملت كدا وقريتهم وفهمت لكل حاجه فيهم يعني لما اطلع الحاجه هكون عارفه كل شبر فيها
..
وخدي بالك من الاوراق دي مهمه جدا تشيلهم في فايل لوحدهم هما والفاتوره لان مفيش ضمان من غير الفاتوره
يارب تكونو استفدكم واسيبكم في رعايه الله واستنو مواضيع جديده عن الجهاز واللي حابه اني اتكلم علي حاجه تقولي واللي عايزه ا استفسار تحت امرها